Sa mùsica baroca at a èssere sa protagonista de s’atòngiu culturale sardu. Comintzat sàbadu chi benit e at a agabbare su 19 de su mese de nadale, a pustis de ses apuntamentos, sa de tres editziones de su fèstival “Nodas sena de tempus”, cuncordadu dae “Atzentos durches”, intra de sos apuntamentos prus isetados dae sos apassionados sardos de custu gènere musicale.

Un’editzione, sa de su 2021, atrivida; istudiada e cuncordada mancari abarrent sas dudas pro sa pandemia de sa Covid-19 e mancari apat connotu un’ismèngua manna de sos contributos pùblicos (de agiomai s’80 %). Giai in suferèntzia in su 2020, pro more de s’emergèntzia pandèmica chi at ingendradu sa firmada de sos ispetàculos in presèntzia e cun resursas econòmicas semper prus piticas, s’iscuadra – ghiada dae su diretore artìsticu Prof. Daniele Cernuto – nd’at istantargiadu su matessi una filera de addòbios de valore artìsticu-musicale mannu, comente a donu pro sos apassionados.

Comente a semper, su pùblicu at a pòdere sighire gratis totu sos cuntzertos e solu a chie at a prenotare su logu pro si sètzere s’at a domandare unu contributu piticheddu, chi s’ispetadore at a pòdere detzìdere fintzas de lu crèschere pro agiudare su cuncordu de su cuntzertu afatante.

Sa faina afòrtigat su ligàmene cun sos Cunservatòrios de Tàtari e de Casteddu e, a manera particulare, cun su “Canepa” e cun s’orchestra sua. S’istitutzione de formatzione musicale arta ghiada dae su diretore Mariano Meloni sighit a mustrare atentu pro su fèstival e disponibilidade pro l’agiudare. Sa punna de su fèstival, difatis, est sa matessi de s’ente: su promovimentu de sa cultura musicale, su de ofèrrere a musitzistas giòvanos chi non sunt galu diplomados momentos de cunfrontu cun maistros de istrumentu connotos a livellu internatzionale, sena de si dèpere transire dae s’ìsula, e su de lis permìtere de sonare in dae in antis de sa gente, faghende-lis leare cunfiàntzia cun custa genia de ispetàculos pùblicos.

A.I.G.

Attività realizzata col contributo della Regione Sardegna – IMPRENTAS 2020-2021. LR 22/2018, art22