Dae su 1 de làmpadas sa Sardigna at a èssere zona bianca: ant a bàlere sas règulas de cumportamentu ebbia. Su provedimentu at a interessare fintzas su Friuli Venètzia Giùlia e su Molise. E, si sighit a andare bene sa situatzione de sos impestos, dae su 7 de làmpadas fintzas Abrutzu, Vènetu e Ligùria ant a intrare in zona bianca.

Comente amus naradu, in sas regiones in zona bianca balent sas règulas de cumportamentu ebbia (impreu de sa mascheredda, respetu de su tretu de seguresa intra de una persone e s’àtera, su de si frigare fatu fatu sas manos cun gel disinfetadore) e isparesset fintzas su proibimentu de essire a su note.

Ma sos italianos, a manera generale, ant a pòdere essire torra a su note cun s’intrada de su solstìtziu de s’istadiale, su 21 de làmpadas; ma giai dae sas oras imbenientes ant a pòdere chenare in foras o abarrare in giru fintzas a sas 11 de note e, dae su 7 de làmpadas, ant a pòdere furriare a domo a mesunote o fintzas prus a tardu, si sa regione in ue bivent o in ue s’agatant in vacàntzia est in zona bianca.

Dae lunis s’at a pòdere andare torra a palestra e dae sa metade su mese de làmpadas is isposos ant a pòdere afestare sa coja. Sos amantiosos de su baddu, pro como, ant a dèpere tènnere passèntzia galu: sas discotecas ant a abarrare serradas, ùnicu setore chi a dies de oe no at una data pro torrare a abèrrere.

Si torrat a abèrrere, duncas, ma a bellu a bellu e cun prudèntzia; a pagu a pagu, pro bìere comente totu at a andare sa curva epidemiològica e pro cumprèndere cale sunt sas fainas chi faghent crèschere de prus sos impestos. Fontes acanta de su Guvernu faghent a ischire ca custos sèberos los ant pigados a s’unanimidade, ma su ministru de sa Salude Roberto Speranza espressat presu mannu pro sa cautela sighida in su apostivigare custas aberturas.

a.i.g.

Attività realizzata col contributo della Regione Sardegna – IMPRENTAS 2020-2021. LR 22/2018, art22